افغانستان کې د ملګرو ملتونو د بشري مرستو د همغږۍ دفتر (اوچا) ویلي، افغانستان کې د میندو د مړینې کچه په هرو ۱۰۰ زرو ژوندیو زېږونونو کې کابو ۶۰۰ ده.
رخشانه: دې بنسټ نن (دوشنبې د غبرګولي ۱۱ مه) په خپله اېکس پاڼه لیکلي، افغانستان په نړۍ کې یو له هغه هېوادونو دی، چې د میندو مړینه په کې لوړه ده.
دغه دفتر زیاته کړې، تخصصي څارنې او په روغتیايي برخه کې د ښځینه روغتیايي کارکوونکو شتون د انسانانو ژوند ژغوري.
د دې بنسټ په وینا، د ښځو پر ګډون د طالبانو محدودیتونو، حیاتي او ژغورونکو خدماتو ته د مور او ماشوم لاسرسی محدود کړی دی.
د روغتیا نړیوال سازمان څه موده وړاندې په یوه راپور کې لیکلي وو، افغانستان کې د میندو مړینه، په هرو ۱۰۰ زرو ژوندیو زېږونونو کې ۵۲۱ مورده ده.
د دې سازمان په راپور کې راغلي، له ۲۰۰۷ میلادي کاله راهیسې، د زېږون مخکې پاملرنه له ۳۱ سلنې ۷۶ سلنې ته او د زېږون پر مهال د ماهرو کارکوونکو شتون له ۲۴ سلنې ۶۷ سلنې ته لوړ شوی دی.
همدارنګه د روغتیا نړیوال سازمان په راپور کې ویل شوي، افغانستان کې په هر یوه ساعت کې یوه مور د مخنیوي وړو عوارضو لکه خونرېزۍ، د وینې لوړ فشار، انتان او سخت زېږون له امله ژوند له لاسه ورکوي.
طالبانو په تېرو نېږدې پنځو کلونو کې په هېواد کې ګڼ محدودیتونه پر ځانګړې توګه د ښځو او نجونو په کار او زده کړو لګولي دي. د دې ډلې د مشر په امر، په نیمه طبي زده کړو کې هم نجونې او ښځې له زده کړو بې برخې کړای شوې دي.
ملګرو ملتونو څه موده وړاندې په یوه راپور کې لیکلي وو، افغانستان کې د نجونو په زده کړو او د ښځو په کار د طالبانو محدودیتونه کولی شي، تر ۲۰۳۰ کال پورې دغه هېواد د ۲۵ زره ښوونکو او روغتیايي ښځینه کارکوونکو له کمښت سره مخ کړي.
طالبانو د ښځینه روغتیايي کارکوونکو پر فعالیت د محدودیتونو تر څنګ، د طبي انستېتیوتونو دروازې هم د افغان نجونو پر مخ تړلې دي.
نړیوالو سازمانونو په وار وار ویلي، چې پر زده کړه او روغتیايي ښځینه کارکوونکو پر فعالیت د طالبانو محدودیتونو، د افغانستان روغتیايي نظام کمزوری کړی دی.
طالبانو ناروغانو ته د روغتیايي خدماتو په رسولو او په روغتیايي مرکزونو کې د ښځینه روغتیايي کارکوونکو په فعالیتونو هم محدودیتونه لګولي دي. اوس مهال ښځینه روغتیايي کارکوونکې باید د خپل شرعي محرم سره روغتیايي مرکزونو ته ولاړې شي او نارینه ډاکتران حق نه لري، چې د ښځینه ناروغانو درملنه وکړي.
